PARIS.- Red Bull ekipo di e dos biaha kampeon mundial Max Verstappen di Fórmula 1, a surpasá nan límite di presupuesto  pa temporada 2021, asina e federashon internashonal di outomobilismo(FIA) a bisa ayera, agregando ku e violashon tabata algu menor. Aston Martin tambe a kibra ku reglanan finansiero, agregando ku kualke sanshon lo keda disidí riba un fecha mas lat. Riba nan kuenta di Twitter, Red Bull a indiká ku nan ta sorpresá i desapuntá den loke FIA a haña pa loke ta nan ekipo. E límite di gastunan a bin den efekto temporada pasá i tabata establesé na 145 mion dòler. Su intenshon ta pa limitá gastunan pa hasi e deporte mas kapas i e kompetensia mas serka  entre e ekiponan grandi i chikí. Mercedes, Ferrari i Red Bull a keda partikularmente afektá. Asta asin’ei, Verstappen a terminá e temporada dor di gana Lewis Hamilton  di Mercedes pa su promé título mundial. FIA a bisa ku aktualmente nan ta determinando e kurso apropiá di akshon ku mester tuma. Den un komunikado nan a bisa ku un violashon menor, ta ménos ku 5%  di e límite total di e ekipo i ku e por resultá den sanshonnan finansiero i òf sanshonnan deportivo. Riba nan kuenta di Twitter, Red Bulll a a indiká ku nan no a faya ku niun regla. FIA a bisa ku a otorgá na shete di e dies ekiponan nan sertifikado di a kumpli ku reglanan finansiero. E di tres eksepshon tabata e ekipo di Williams, kaminda tabatin problemanan ku un violashon den prosedura, kual e ekipo a remediá  na e momentu korekto, transparente i koperativo.