WILLEMSTAD.- Ku hopi satisfakshon Refineria Isla BV ta wak bèk riba un tremendo Karnaval 2018. No solamente Refineria Isla tabata presente den nos karnaval di mucha pero e aña aki Refineria a bolbe presentá ku su grupo di hende grandi. Di reakshonnan ku nos a haña e grupo aki a kai masha na smak di e públiko.
Refineria Isla ta kere ku maske ku e situashon finansiero no ta esun mas deseá na e momentunan aki, e kompania tin un kompromiso ku nos komunidat ora ta trata di aktividatnan ku ta na bienestar di nos komunidat en general.  Ta ta e motibu ei Refineria no a duda  ningun momento pa partisipá komo branding partner den nos festival di Tumba 2018 i a hasi su máksimo pa bolbe bini bèk ku e grupo di hende grandi.
Pa lokual ta trata Isla hubenil  e mensahe di e muchanan tabata: Spar awe pa bo tin mayan. I kon  hasi esaki mas bisto ku un Porkitu  ku ta representá un sparpòt ku semper nos muchanan ta usa pa spar sèn aden. Ora ku e sparpòt aki yega tin ku kibra esaki pa saka e sèn i asina hasi e aktividat pakiko a spar. Asina ki e mucha ta siña for di chikitu ku si e ke logra algu e tin ku siña spar. Hasiendo esaki e deseo di e mucha por wòrdu kristalisá.  Hopi hende ora nan tabata wak e muchanan desfilá lo a bai bèk den tempu kaminda e sparpòt tabata tin un lugá spesial den kada kas di famia.  E sparpòt aki kada mucha tabata karga riba nan kabes i e kolo ros tabata bria huntu ku e trahe di muchanan. Ku esaki Refineria Isla ta spera di por a rebibá un pida bèk di nos kultura.
Pa lokual ta trata nos hende grandinan akinan tambe Refineria Isla a skor ku su  “Aventura den mundu di Pinnocchio”   Den e fantasia aki bo ta realisá ku p’abo alkansá algu den bida bo tin ku kuminsá na soña i soñando bo bida ta haña koló.  Den e aventura di Pinnocchio bo ta realisá ku tin biaha pa mas difísil ku sierto kos ta, hasiendo uso di fantasia nos ta logra. Na e krusada ku Kòrsou na e momentunan aki,  nos mester di hopi fantasia pa nos por logra nos metanan  final. No solamente e trahenan tabata lusi masha bunita mes,  pero tambe e karosa ku su Pinnocchio grandi ariba a keda una beyesa. Sin duda algun,  regreso di Refineria Isla den nos marcha di hende grandi,  a yuda duna un realse na nos selebrashon di nos karnaval. Spesial si bo mira kon bunita e trahenan a keda i tambe e Pinnocchio chikitu,  ku bo por a mira  riba kada unu di e kos di kabes di e partisipante. E Pinnocchio aki na miniatura,   tabata  atmirá e fiesta di karnaval  su dilanti.
Refineria Isla  ta sumamente satisfecho ku  e presentashon di e grupo di hende grandi,  i ta hopi orguyoso di por a kontribuí un biaha mas na eventonan ku ta importante pa nos komunidat.  Kòrda ku No ta pòrnada e lema di Refineria Isla ta : Ku Kurason pa Komunidat.
Refineria Isla ta felisitá pueblo di Kòrsou ku su Karnaval 2018 i ta sigur ku awor ku e periodo aki ta tras di lomba un i tur lo bai bèk den nan seno i usa e temporada di kuaresma aki pa reflehá riba e retonan masha grandi ku nos tin nos dilanti.
Riba e potrètnan nos por atmirá tantu e grupo Hubenil komo e grupo di Hende grandi ku a partisipá den nos Karnaval 2018.