WILLEMSTAD.- Regine Pieters (22 aña) ,  eks alumno di Fina Dance Art School i bailarina di Simia Dance Company a gradua resientemente na  Belhaven University  Dance department , universidat ku ta  keda na Jackson, Mississippi.
Despues di un estudio pisa ku a dura 4 aña largu na e akademia di  baile, Regine a risibí e título di ‘Bachelor Fine Arts in Dance’.  Awor e ta ofisialmente un bailarina i koreógrafo profeshonal.  Ademas ela risibí anotashon èkstra den pedagogia i ‘Dance Teaching Methods’.
Por lo pronto Regine lo keda den eksterior kaminda ela haña un kontrakt di trabou na Dishman & Co, kual ta un kompania di baile moderno na New York.
Na Dishman & Co.  Regine lo traha no solamente komo bailarina pero tambe komo asistente den produkshon i e lo asistí den ensayonan.  Alabes,  e intenshon ta pa e sigui profeshonalisá i desaroyá den e arte di baile kontemporáneo dor di partisipá na ‘intensives’ i kursonan na  Alvin Ailey School,  un skol mundialmente renombrá.
Den futuro Regine ta deseá di tin su propio kompania di baile profeshonal i organisá proyektonan edukativo na Kòrsou.
Na yüni e lo tin su último presentashon na Kennedy Centre, Washington ku un koreografia ku a ser skohé komo e mihó den kampeonato nashonal di koreografia. Esaki ta e kampeonatonan entre e akademianan di baile.
Regine a kuminsá ta baila na Fina Dance Art School for di su 4 aña pa sigui den e skol pre-profeshonal pa  baila den Simia Dance Company. Despues di a konkluí esaki  e por a hasi oudishon na e Universidat di Belhaven.  Fina Dance Art School/Simia DC ta sumamente orguyoso i kontentu ku e bon notisia i ta deseá Regine un futuro briante den e mundu di baile.