Relashoná ku partido Kòrsou v/s Guatemala

WILLEMSTAD.- Hopi ta e preparashonnan ku ta tumando lugá relashoná ku e partido di futbòl di djamars 8 di yüni benidero, na momento ku selekshon di Kòrsou risibí e ekipo nashonal di Guatemala den wega di Grupo C di CONCACAF ku bista riba Kopa Mundial 2022. Presidente di F.F.K., Shaheen Elhage, a duna di konosé na EXTRA ku nan a dirigí un karta na FIFA relashoná ku e ambiente rondó dje partido i ku nan ta en espera di un reakshon.

Elhage a splika ku nan a risibí lus bèrdè pa un máksimo di 50% di loke Stadion Ergilio Hato ta karga na públiko. Komo direktiva di FFK sin mas ke atené na reglanan di gobièrnu. “Ademas di e kantidat máksimo di públiko, nos a haña instrukshon di kondishonnan ku kua mester kumpli tantu paden komo pafó di stadion, tambe kondishon ku kua fanátikonan mester kumpli”. Den reunion ayera nochi, direktiva di F.F.K. a hasi un evaluashon di tur e reglanan, a saka potrèt i ta manda kontra proposishon na gobièrnu.

“Nos tambe ke mas tantu hende posibel. “Pero nos ta konsiente ku mester kumpli ku sierto regla ku bou di kondishon normal no ta keda apliká, pero ku awor si ta bálido pa no pone hende na riesgo. “Nos ta yuda pensa, nos ta hasi proposishon i huntu nos tin ku yega na loke ta aseptabel bou dje situashon aktual”, segun Elhage a sigui bisa.

Un punto riba kua tin un desishon definitivo, ta benta di karchi ku no por tuma lugá di e manera ku kua tur hende a kustumá. Asuntu di diferente punto di benta ta trese aglomerashon di públiko, ku riesgo ku outoridat ta sera e establesimentunan ku ta bende karchi. “Nos lo publiká kon e benta lo tuma lugá, eventualmente di forma digital i ku FFK lo sòru pa hasi entrega di karchi despues di risibí prueba di pago. “Ta kosnan riba kua nos a diskutí”.

Riba e punto ku si por yega na e situashon ku ta hendenan ku a bakuná so por drenta Stadion Ergilio Hato, Elhage a pone bon kla ku ta desishon di gobièrnu ta konta. “Si gobièrnu bisa ku ta hende vakuná so por drenta, anto bo t’afo si bo no a vakuná. “Nos ta bai ku regla di gobièrnu”, segun Elhage a asentuá.

Otro punto riba kua tambe ya tin desishon, ta ku e fanátikonan ku asistí lo no por lanta bai bar. Mester evitá aglomerashon. Manera e presidente di F.F.K. a agregá, ta hopi trabou tin komo preparashon pa e partido v/s Guatemala pa kua sigur tin hopi interes.