WASHINGTON, AFP.- E denunsiante di Facebook Francen Haugen a ofresé informashon riba kon e gigante di retnan sosial ta funshoná. For di un kultura di aislamentu te e daño na imágen di e adolesente, Haugen a relatá na senadornan merikano loke el a mira den e empresa.

Esaki ta algun di e aspektonan ku a destaká den su testimonio;

Facebook, e Frankenstein-

“Si separá Facebook i Instagram, ta probabel ku mayor parti di e sèn publisitario lo bai pa Instagram i Facebook lo sigui ta e Frankenstein ku ta pone na peliger bida den henter mundu. E sistemanan aki lo sigui eksistí i lo ta peligroso inklusive si nan ta daña”.

Estudio di empresa-

“Mi ta kere ku ta vital importansia pa establesé mekanismonan pa e investigashonnan interno di Facebook sea divulgá na públiko di forma regular”.

Kultura di aislamentu-

“Facebook tin un kultura ku ta pone énfasis ku e kaminda ku tin di sigui ta di aislamentu pasobra si e informashon keda kompartí ku públiko, simplemente e lo keda malinterpretá”.

E kambio lo no trese ruina-

“Hopi di e kambionan ku mi ta papiando di dje lo no hasi ku Facebook lo stòp di ta un empresa rendabel”, asina el a bisa.”Simplemente e lo no ta un empresa ku un ganashi kuantioso manera awe”.

Edat minimo-

“Mi ta pidi pa subi e edat di 16 pa 18 aña, basa den e opservashon di e datonan riba e uso problemátiko òf e adikshon di e plataforma i e problemanan outo-regulashon di e muchanan” el a bisa. Aktualmente límite ofisial pa uni na Facebook ta di 13 aña.

E senadornan a primintí un biaha mas di frena e poder di Facebook, impulsa e biaha aki pa revelashonnan di un eks empleado ku ta sostené pa e propio investigashon di e kompania. E esfuersonan pa regulá mihó e plataformanan di e gigante teknológiko, ku ta risibí miónes di usuario, te ainda a bai slou i inefikas.

Redusí e poder ekonómiko di Facebook i vigilá  su maneho di modernisashon ta dos reto prinsipal pa e funkshonarionan elegí di Merka. Na fin di yüni, un komishon parlamentario a aprobá seis proyekto di lei ku ta sòru pa e kaminda pa posibel desmantelashon di Google, facebook, Apple i Amazon. E leinan aki ta prohibí nan di atkerí kompetidonan. Tambe sòru pa un sistema ku e usuarionan por bandoná Facebook ku nan kontaktonan i informashonnan personal.