500.000 mion euro èkstra pa kombatí kriminalidat!

DEN HAAG.-Awe, e di tres djamars den Sèptèmber, tabata e momentu ku su altesa Rei Willem Alexander a presentá pensamentu i deseonan di e gobièrnu pa e aña parlamentario ku ta kuminsá awe durante di e asina yamá ‘Prinsjesdag’. E aña aki tambe debí na Covid-19 i medidanan relashoná ku esaki Rei a pronunsiá su diskurso den Grote Kerk na Den Haag. Esaki ta e di dos bia ku no ta pronunsiá e diskurso den ‘Ridderzaal’ den presensia di mas ku mil hende. Pa e aña aki tabatin alrededor di 250 persona.

Apesar di medidanan tòg algun persona a bai para na sitionan stratégiko pa tòg haña un bista na momentu ku pareha real pasa den outo pa bai Grote Kerk. E atenshon pa Kas Real ta keda apesar di gritu den sierto gruponan pa elimina monarkia. Pa loke ta trata su diskurso Rei Willem Alexander a para ketu tambe na e morto di Peter R. de Vries ku rei a yama “nieuw dieptepunt”. Den e kuadro ei el a bisa ku e pais mester bai invertí mas tantu den seguridat i kon pa kombatí kriminalidat digital. Gobièrnu ta pone 500.000 mion euro adishonal disponibel pa aktua kontra di kriminalidat organisá.

Tin hopi intrankilidat, pero Ulanda ta keda un pais bon pa biba. Den liñanan grandi esei Rei Willem Alexander a trese dilanti den su diskurso na okashon di apertura di aña parlamentario. Otro aspekto ku tambe a haña atenshon ta kambio di klima i su konsekuensianan i e desaroyonan riba panorama mundial. Tur hende ta korda e aña aki kon den yüli i ougustus hopi áwaseru a pone ku e partinan mas sur di Ulanda tabata praktikamente bou di awa. Hopi hende a sufri hopi daño pa esei.

Tambe el a indiká ku gobièrnu mester asumí responsabilidat den e kaso di ‘toeslagenaffaire’ i tambe e dañonan ku hendenan ta sufri na Groningen debí na temblor. Ta tarda demasiado pa kaba di atendé e asuntu aki. Den e kaso di ‘toeslagenaffaire’ ta kla ku a kometé inhustisia kontra parti di e poblashon anto awor mester koregí e fayo ei dunando e hendenan nan kompensashon mas lihé posibel.