WILLEMSTAD.–   Masha ten kaya ta pidi, awèl kaya ta haña!  “Rei Di Kaya” ta un konsepto diferente, kayente i ku ambiente ku e tim dinámiko di MCB Softbal Team i gruponan di karnaval Vise Versa i Hats off To Dreams (HOTD) a bin kuné pa selebrá en grande e di 50 edishon di karnaval. Kaya ta papia ku djasabra 8 di febrüari ta “Rei Di Kaya” ta bai dominá kaya di 8 pm pa 3 am na Seru di Ararat, lugá di parker di TeleCuracao. Style di kaya bo ta haña un bunita bista riba Willemstad i nos haf i dushi bientu. Por stashoná outo na parkeerplaats di ofisina prinsipal di ENNIA i den área di waaigat i den kaya na Skalo. Lo tin transporte pa “jumpersnan” di “Rei Di Kaya” subi kaya ku bus bai Seru di Ararat unda e ambiente di kaya ta bai kulminá. Lo tin bon seguridat den e kayanan pa yuda kuida e outonan.
E nòmber “Rei Di Kaya” ta keda usá pa e kantante ku no a sali Rei di Tumba pero si tin un òf mas tumba òf roadfire na su nòmber ku a i te ainda ta hasi e hendenan durante henter e temporada di karnaval kayente kayente den kaya. E vishon di Jump In “REI DI KAYA” ta pa huntu ku e ferviente karnvalistanan nos rebibá e nostalgia di  jump up nan di ántes manera Gypsys, Coca-Cola, KMPG, Blue Ribbon i baila gosa riba roadfirenan kayente i tumbanan di Reinan di kaya.  Pa buta ambiente di kaya lo tei GIO, ERA, ONE, ICONS, DJ Bryan Rosa, Rei di Tumba 2020 i bòshi legendario Rei di kaya.
Entrada general pa “Rei Di Kaya” ta 50 florin i VIP ta 125 florin. Karchinan ta optenibel serka tur miembro di MCB Softbal Team i gruponan di karnaval Vise Versa i HOTD. Na kompra di bo karchi di “Rei Di Kaya” bo ta risibí un super bunita “dryfit” shirt di kaya ku un diseño full di print na koló ku e nòmber “Rei Di Kaya”. Tur kos na “Rei Di Kaya” ta “costum made” aki na Kòrsou pa talentonan di nos dushi isla. Sigui medionan lokal, pagina di facebook i instagram di “Rei Di Kaya” pa tur informashon.
Un danki special na nos partnernan BSure i TeleCuraçao rumbo pa 60 aña pa nan gran aporte.