NA KLANG, TAILANDIA, AFP.- E rei di Tailandia, Maha Vajiralongkorn a bishita un hospital djabièrnè, den provinsia di Nong Bua Lamphu, na nort di e pais, pa kompaña famianan ku a pèrdè nan sernan kerí den un masakre ku a laga 36 morto, prinsipalmente muchanan na un krèsh. Un polis ku a haña retiro a ehekutá e atake.
E rei tin intenshon di reuní ku e sobrebibientenan di e atake di djaweps, un di e atakenan di mas pió den historia di Tailandia. Den oranan di atardi, promé minister Prayut Chan-O-Cha a pone un bukèt di flor blanku dilanti di porta di e krèsh.
Arma ku un pistol di 9 mm i un kuchú, e atakante, Panya Khamrab, a basha bala riba e krèsh den provinsia di Nong Bua Lam Phu den oranan di mèrdia. Despues di esaki el a hui en un outo, el a dal vários peaton riba kaminda i despues di esaki el a mata su kasá i su yu hòmber promé ku el a kometé suisidio na su kas, segun indikashon di polis.
E hòmber a mata 4 adulto ku tabata traha na e krèsh i despues ku el a basha un porta abou ku su pia el a kuminsá kòrta garganta di e muchanan ku un kuchú”. E hòmber a haña retiro di kuerpo polisial den yüni pa konsumo di droga.
