WILLEMSTAD.- Pa su partisipashon na Festival di Tumba Hubenil e hóben Gian van Eiker a pidi tur su fanátikonan pa koperá i kumpra un T-shirt pa 5 florin.
Gian a resultá Rei di Tumba Hubenil 2018 i ku e montante ku el a generá ku benta di T-shirt el a hasi un donashon na Parke di Bestia.
Ultimo biaha ku el a bishitá Parke el a hañ’é hopi dekaí i ku e donashon e ke aportá na e lucha di Tio Bert pa pone nos Parke di Bestia bèk riba pia.
Ayera mainta huntu ku e otro embahadornan di Karnaval 2018, Gian a bai Curaçao Zoo serka Tio Bert i a hasi entrega di e check. Pa Tio Bert esaki tabata algu di apresiá i el a keda sumamente agradesido. Despues Tio Bert a laga Gian entreg’é na e persona adekuá ku ta enkargá ku e kuido di e matanan pa planta den Parke ku ta wòrdu kultivá pa muchanan di skol.
Gian, ehèmpel di un ‘role model’ pa nos hóbennan.
Riba foto momentu ku Gian van Eiker ta hasi entrega di e chek na Tio Bert di Curaçao Zoo.