LONDON, AP.- Reina Elizabeth II di Gran Bretaña a aprobá un solisitut di gobièrnu pa suspendé Parlamento meimei di e krísis kresiente relashoná ku Brexit. Esaki ta pone ku e lidernan di oposishon tin ménos tempu pa purba impedí Brexit sin akuerdo.
E desishon no tabata inesperá, ounke ku e monarka a ninga di involukrá den polítika durante su reinado largu.
Promé minister Boris Johnson a papia ku e reina, hefe di Estado di Reino Uní djárason. E reina ta polítikamente neutral i ta purba sigui konseho di su gobièrnu pa asuntunan polítiko.
E anunsio tabata un sorpresa pa diputadonan, di kual mayoria ta ku fakansi. E presidente di Kámara di Komun a reakshoná furioso bisando ku e no tabata sa di Johnson su plan.
“E suspenshon aki ta un ofensa na e proseso demokrátiko i na derechi di e parlamentarionan komo representantenan di pueblo. Den e etapa trempan aki di su mando, e promé minister mester establesé i no destrosá su kredensialnan demokrátiko i su kompromiso ku demokrasia parlamentario”.
Legisladornan a deklará djamars ku lo traha huntu a purba para un salida sin akuerdo. Johnson a primintí ku e lo saka e pais ku òf sin akuerdo for di Union Europeo riba 31 di òktober.
![](https://extra.cw/wp-content/uploads/2019/08/brexit-2-300x200.jpg)