WILLEMSTAD.- Un fly di sakrifisio ku basenan yen den di 11 inning a duna Pto. Rico triunfo di 4-3 riba Reino Ulandes, klasifikando e borikuanan pa e gran final di World Baseball Classic.

Den un tremendo partido hungá ayera nochi den Dodger Stadium, e dos ekiponan aki a tene otro na 3-3 durante gran parti dje partido. E desenlase a presentá den di diesun entrada na momento ku Pto. Rico a hasi bon uso dje regla di ‘tie break’ pa skor e kareda di viktoria.

Promé ku esei, Reino Ulandes tambe a hasi e hugadanan korekto den kabes di 11. Dos hòmber na base, manera e regla di ‘tie break’ ta bisa, a sigui toke pa avansá koredónan. Sinembargo, e picher borikua a dominá Curt Smidt ku roletaso bon pa doubleplay.

E borikuanan si no a faya. Nan a usa e mesun strategia, pero ku e diferensia ku nan a liga e bataso riba kua e koredó na 3ra por a pisa i ranka bai ‘home plate’ kaminda e tiru di centerfielder Profar tabata floho i habrí.

Muchu mas promé ku esei, den promé entrada Reino Ulandes a bai ariba 2-0 ku tremendo homerun di Coco Balentien. Pero promé ku esei, e kècher borikua a bula tantu Andrelton Simmons na 2da i Jurickson Profar na 1ra.

Pto. Rico ta empatá den bòm di promé riba homerun i den bòm di dos ta bai ariba 3-2 ku otro bataso di kuater skina. Hit di Shawn Zarraga mas despues ta empuhá Balentien ku e kareda di empate: 3-3.

Despues di esei a sigui bon picheo i tremendo fildeo di ámbos banda. Mester pone atenshon speshal na diferente hugada sensashonal di parti dje defensa borikua.

Mas aleu mester menshoná bon trabou riba montíkulo di parti di Jair Jurrjens, Shai Martis, Stuifberg i Kenley Jansen kende a hasi nuebe lansamentu di kua ocho tabata strike.

Ku e viktoria, Pto. Rico awor ta den final i awe lo sa ken ta bira nan rival.

...Coco Balentien den selebrashon despues di a konektá homerun den promé inning...