WILLEMSTAD.- Universidat di Kòrsou ta invitá bu na un konsierto grátis di muzik di siglo 16 i 17 interpretá pa e artista kolombiano, Armando Fuentes. Esaki no ta solamente muzik antiguo, e músika ta bibu, aktual, no akadémiko i sigur nunka bieu, toka ku zonido di mas ku 300 aña ku ta zona komo si fuera esaki a keda produsí ayera. Armando lo presentá komposishonnan Medieval i di Renasementu for di manuskritonan históriko ku semper ta skonde historianan riku ku ta spera di ser revelá atraves di interpretashon i investigashon. E konsierto ku lo tuma lugá riba djárason, 25 di aprel den Fortkerk, ta forma parti di aktividatnan di e proyekto di investigashon i kreashon ‘Capilla Santa Barbara’ di Universidad de los Andes, Bogota Colombia. E resital ta posibel danki na e akuerdo di interkambio akadémiko entre Universidat di Kòrsou i Universidad de los Andes, Colombia i ta keda patrosiná pa e empresa lokal, RE-Quest Research & Consultancy. Entrada ta grátis. Tene na kuenta ku lugá ta limitá i ta sinta konforme ora di yegada.