WILLEMSTAD.- Djabièrnè último GreenKidz a sera aña eskolar ku un fiesta fenomenal na Kurá di Arte. Puntonan kulminante tabata e emoshonante kompetensia di Eco Rap kaminda ku Kolegio Dodo Palm di Seru Fortuna a sali ganadó i tambe e aktuashon sorpresa di rèpdó Mason tabata un hit.
Ella Rosa i Nathaly Werleman, organisadónan prinsipal di e fiesta GreenKidz ta kontentu ku e resultado. Señora Rosa a bisa: ‘Lunanan largu nos, huntu ku un tim grandi di patrosinadónan i boluntarionan, a traha duru pa duna e fiesta di GreenKidz akí un karakter úniko di bèrdè. Nos a logra. Aña eskolar ku a kaba di finalisá nos a traha amenamente ku nuebe skol GreenKidz nobo i tabata un plaser pa pone tur maestro i direktivanan di skolnan partisipante den foko di atenshon. Tambe pa desafiá tur e 350 muchanan di skol GreenKidz di manera kreativo i musikal ku nos kompetensia di Eco Rap.’

Eco-rap trahá pa nan mes, komo material pa lès
Ya pa tres aña GreenKidz huntu ku un tim grandi di profeshonalnan lokal i dosentenan entusiasmá ta krea material di enseñansa pa medioambiente moderno i grátis pa kada mucha na Kòrsou.
E ta hasi esaki ku aktividatnan (pafó di skol) edukativo i material di lès kolorido. ‘Nos mensahe prinsipal ta ‘Ta orguyoso di bo mes, bo skol i bo isla’, Ivonne Zegveld i Maya Mathias, fundadónan di GreenKidz ta konta. ’Nos ta stimulá e muchanan pa nan kuida otro i kuida nan isla’.
E aña akí e muchanan mes a komponé un rap hep ku e mensahe bèrdè aden i nan skolnan por ta orguyoso di nan. Zegveld a elaborá: ‘Pronto e rapnan akí lo ta riba e websait di GreenKidz, i diferente medionan sosial i usá den e material di skol. Di e manera akí tur hende por siña i disfrutá di dje. Esaki ta fit bon den nos vishon ku tur nos material di lès bilingwe ta aksesibel gratuitamente pa tur ku ta interesá por usa.’
Despues di un tremendo fiesta di klousura ku workshopnan di obra di man i músika i ku presentashon di dj Alana de Haak i rèpdó Mason, tur mucha a haña un sorpresa èkstra. Rotary Club Willemstad huntu ku ‘Uniting For Children Foundation’ a sòru pa kada alumno meresidamente por a risibí un bunita buki di klùr edukativo di GreenKidz regalo pa bai kas kuné.

Pa mas informashon tokante GreenKidz bishitá www.greenkidz.org i na Facebookpagina Greenkidzcuracao. Riba fotonan por apresiá algu dje ambiente na GreenKidz.