WILLEMSTAD.- Pa di seis aña konsekutivo Estreno MAS Pikete (EMP) lo tei pa selebrá huntu ku pueblo di Kòrsou den Karnaval 2018! Mané a bira un kustumber kaba Estreno MAS Pikete lo tei ku hopi ambiente, inovashon I kreatividat.

Djadumingu último anochi Estreno MAS Pikete a presentá nan trahenan, diferente i impaktante ku nan lo desfilá kuné den Karnaval 2018. E trahe ta bunita, luhoso i trendy, I ku un preis pagabel pa un i tur por partisipá I yuda engrandese nos Karnaval!

Den un presentashon di trahe pa públiko den Riffort, Estreno MAS Pikete a revelá nan tema ku ta unu ku ta pone tur hende den marcha pero tambe na kantu, bula di alegria mané e kabai buladó ‘Pegasus’! Representando Pegasus den e mitologia di Gresia e miembronan di EMP lo baila, gosa I bula sin fin den e kayanan di nos dushi Kòrsou.

Un danki ta bai espesialmente na diseñadó Juan Carlos Padrino I Sra Rudt Sintiago ku semper tin nan Diseñonan ku ta hala atenshon. Mané nan ta bisa ‘ Never change a winning team’

E aña aki EMP lo bai un biaha mas ku su dos bandanan di aña pasá, esta nan banda di kas Dreams, e banda Dolce I tambe nos DJnan. Tur hende ta kustumbrá ku tur aña di nobo tin inovashon. Por spera esaki e aña aki tambe. EMP ta un famia ku tin ambiente, kalor I Hopi Kreatividat!

EMP ta invitá bo pa like nan facebook page "Estreno Mas Pikete" pa asina tur hende por keda na altura di tur e trabounan rumbo pa Karnaval 2018. Pa mas informashon por subi nan website:  www.estrenomaspikete.com òf por manda un meil na estrenomaspikete@gmail.com.