WILLEMSTAD.- Dianan 25 i 26 di novèmber e pianista kurasoleño Randal Corsen ta duna un konsierto kuné so na piano tokando músika klásiko na La Belle Alliance den Avila Beach Hotel.

E programa ta konsistí di obranan di un kantidat di kompositor faborito di Corsen, manera De Falla, Albeniz, Granados, Chopin, Schubert, pero klaro komposishonnan di su tatarawela Joseph Sickman Corsen no por keda afó.

E konsiertonan di 25 i 26 di novèmber ta Corsen su promé resitalnan komo solista kompletamente ku músika klásiko, ke men un primisia pa Avila. Originalmente Corsen lo a presentá e programa den Snoa na Punda, pero direktiva di Snoa a konsiderá esei meimei di e tenshonnan internashonal awor no apropiá.

Corsen a disidí e ora ei pa laga e konsierto sigui tòg i p’esei ta muda awor pa La Belle Alliance na Avila Beach Hotel. De paso, einan tin un di e mihó pianonan di kola na Kòrsou: e Bösendorfer Grand. Komo ku ta trata di un sala mas chikitu, lo hasi dos konsierto, di moda ku tin sufisiente oportunidat pa presensiá e konsierto.

E promé ta djasabra dia 25 di novèmber, for di 8 or di anochi. E di dos konsierto ta tuma lugá djadumingu dia 26 di novèmber kuminsando 10 or di mainta. E último aki ta trata di un ‘konsierto di kòfi’ loke ta kuadra ku e tradishon musikal riku di La Belle Alliance. Karchi di entrada ta optenibel na Mensing’s Caminada, atraves di WhatsApp 515-0829 i si sobra tambe na entrada.

Randal Corsen ta konosí na promé lugá komo pianista di jazz, pero durante último añanan el a mustra su kara frekuentemente tambe den seno di músika popular lokal. Na 2004 el a gana e Edison Jazz Award na Hulanda i ku regularidat e tabata na North Sea Jazz festival na Rotterdam, pero típiko di su universalidat ta ku na 2019 e tabata e areglista di Dibo D su tumba ganador di karnaval durante e Festival di Tumba di Kòrsou.

Anke ku un resital di piano ku músika klásiko ta parse un paso sorprendente, tòg e no ta totalmente inesperá Semper Corsen tabatin un amor grandi pa músika klásiko i el a laga esei influensi’é tambe. Esei bo por tende bèk, entre otro den su areglonan ku e Orkesta Metropol. Na 2005 el a saka en koperashon ku Fundashon Musikal S.E.L. Maduro tambe e disko kompakto di dje komo solista na piano ‘Corsen plays Corsen’, kaminda e ta toka obranan di piano di su tatarawela JS Corsen (1853-1911).

Ademas e tabata envolví komo pianista i areglista na e promé disko kompakto di e mezosoprano Tania Kross titulá ‘Corazon’ ku a gana un Edison, i el a komponé pa e mesun Tania Kross aki e promé (i úniko) operá na Papiamentu, ‘Katibu di Shon’. De paso, na e dos konsiertonan Tania Kross lo duna un introdukshon di e programa.