KRALENDIJK – Restunan
mortal di e dos víktimanan di
asesinato/homisidio/suisidio
ku a kai na kuminsamentu di
siman pasá a bai Hulanda ku
KLM djaluna anochi. Na e
instituto NFI ta bai hasi
investigashonnan mas profundo
na ámbos kurpa, pa asina
determiná kiko a pasa presis.
Spesialmente den kaso di e
señora ta importante pa haña
ku por papia di suisidio òf
asesinato/homisidio.
E dos kasonan aki mientrastantu
tin nòmber. Esun di e
señora venezolano ku a haña
morto den un kas na Kaya Irma
ku perforason di bala yama
Alamo, miéntras ku e asesinato
den Kaya Kòrsou den kua Jowi
Wise (Theodora) a pèrdè su
bida ta Alapaha.
Ministerio Públiko a konfiská
ámbos kurpa pa investigashon.
E kurpanan aki,
despues di a permanesé den e
fasilidatnan di ‘Nos Konsuelo’,
a sali djaluna anochi ku rumbo
Hulanda ku buelo di KLM, na
unda lo bai analisá e restunan
mortal aki riba spesialmente e
leshonnan di bala ku nan a
risibí.
Den pasado tabata otro.
Tabata bini un patálogo anatomista
for di sea Kòrsou òf
Aruba pa hasi outopsia di lei
na Boneiru mes. Pero desde 10
di òktober 2010 ku Boneiru su
status a kambia i ta resortá
direktamente bou di Hulanda,
a kuminsá ta manda restunan
mortal di krímen NFI, ku tin su
instalashonnan na Rijswijk.
Bosero di Ministerio Públiko
Norman Serphos a splika, riba
pregunta di Extra, a splika ku
e motibu ku ta manda restunan
mortal Hulanda ta simplemente
pasobra na NFI lo por hasi mihó
investigashon.
Nederlands Forensisch Instituut
(NFI), anteriormente
konosí komo Gerechtelijk Laboratorium,
ta un laboratorio
na Hulanda ku ta hasi investigashonnan
forénsiko relashoná
ku krímennan kometé. Dia
30 di yüli 1945, atraves di un
dekreto ministerial, a disidí pa
lanta Gerechtelijk Laboratorium.
Tres aña despues, na
1948, e laboratorio aki a bira
un parti independiente di
Ministerio di Hustisia.
Na 1951 a funda un instituto
relatá bou di e nòmber di
Gerechtelijk Geneeskundig
Laboratorium (despues yamá
Laboratorium voor Gerechtelijke
Pathologie. Patálogo
anatomista dr. Jan Zeldenrust
tabata e promé direktor di e
laboratorio aki, ku dia 1 di
novèmber 1999 a uni ku Gerechtelijk
Laboratorium bou di
e nòmber di NFI.
Durante tratamentu di
kasonan penal den korte e último
añanan, sigur despues ku
Boneiru a bira un munisipio
spesial di Hulanda, e nòmber
di NFI ta kai kada bes, pa
motibu di investigashonnan ku
polis i Ministerio Públiko ta
pidi nan hasi.
E siman aki kuerpo polisial
Caribish Nederland (KPCN) a
haña tambe yudansa di Polis
Nashonal di Hulanda pa loke
ta trata e investigashon den
tantu e kaso Alapaha komo
Alamo.
Alapaha ta un investigashon
ehekutá pa un asina
yama team TGO (Team Grootschalig
Optreden). Den investigashonnan
kriminal grandi
ku embergadura grandi ta
usual ku polis i OM ta skohe
pa start un TGO pa ora ta trata
di un investigashon kompliká
ku mester di mas kapasidat òf
ekspertisio spesial. Pa kordiná
e trabou di reshèrshi i envolví
nan a base di un plan spesífiko,
ta hasi uso di TGO pa asina
garantisá un manera di traha
mas vasto.