WILLEMSTAD.- Ayera tardi a tuma lugá un reunion di AGKK ku e meta pa duna informashon riba e último desaroyonan relashoná ku Karnaval i alabes a sera konosí ku e presidente nobo di hurado pa Karnaval.
Henny Reinilla, presidente di AGKK a indiká ku e reunion a kana bon i ku sala tabata yen.
Ayera e gruponan a sera konosí ku Sr. Erwin Kranenburg ku ta e presidente nobo di hurado. Na mes momento a atendé tambe e parti di kriterionan pa kon e gruponan tin ku keda husga. A diskutí si ta nesesario pa trese adaptashon i kon ta husga pa skohe e grupo di aña.
Na final dje reunion a kumbiní ku lo bin un formulá kaminda ta yega na un husgamentu ekivalente a base dje totalidat ku kada grupo presentá.

TOKA TUMBA
Otro punto ku a keda atendé ayera ta e proposishon di AMAK pa toka mas tumba durante di marchanan. E kontesta di ‘wie betaald bepaalt’ a bin riba mesa, paso gruponan a trese dilanti ku no por obligá kiko mester wòrdu toka. Miembronan ta paga i nan ta disidí si ta toka piesanan popular, nan ta disidí kiko nan ke baila i kiko mester wòrdu toka.
For di Sr. Reinilla por a komprondé ku mañan tin un reunion ku AMAK kaminda lo sigui buska un solushon pa e punto aki.

KUR VEHIKULO
Otro dje puntonan ku a keda atendé ta e kùrmentu di vehíkulonan ku ta partisipá den e diferente marchanan di Karnaval. Tin un proposishon pa kùr e vehíkulonan na Keuringslokaal, pero ta pendiente pa risibí kontesta di ministerio di VVRP i Minister di Hustisia. E motibu dje desishon aki ta pa por kontrolá e ekiponan mas skèrpi, pa no laga nada sosodé pa lamentá despues. Ta pendiente pa den e siman aki por risibí un aprobashon pa dje forma ei notifiká gruponan di fechanan pa kùr e vehíkulonan.