WILLEMSTAD.- Fundashon Seú ta invitá tur Lider di Grupo di Seú na un reunion general relashoná ku realisashon di Festival di Seú 2018. Manera semper partisipashon na e reunion aki ta di índole krusial. Echo ta ku e aña aki atrobe tempu ta korto, sea ku Marcha di Seú Mayó ta tuma lugá ya dia 2 di aprel 2018.
Durante di e reunion general aki, ku lo tuma lugá djasabra 11 di novèmber benidero pa 9.30 di mainta na Club di Shell, lidernan lo risibí informashon adishonal relashoná ku desaroyonan nobo den Fundashon Seú.
E reunion ta kuminsá presis na ora, di moda ku esun ku ta lat ta pèrdè informashon. Direktiva ta konta ku e koperashon balioso tradishonal di tur lider, p’asina huntu sali determiná pa e di 43 Festival di Seú sea unu eksitoso.