SIUDAT DI MEXICO, AP.- E tenshon entre México i Merka ta krese ku kada minüt ku kanselashon di e enkuentro ku e presidentenan tabatin planiá pa 31 di yanüari.

“Awe mainta nos a informá Kas Blanku ku mi no ta bai asistí e reunion di trabou programa pa próksimo djamars”, asina e mandatario mehikano Enrique Peña Nieto a tweet djaweps despues ku su homólogo merikano a señalá ku e enkuentro no tin sentido si México ninga di paga pa e muraya na frontera.

“Si México no ta dispuesto na paga pa e muraya nesesario aki, e ora ei ta mihó kanselá e próksimo reunion”, segun indikashon di e republikano.

Mas lat durante un intervenshon dilanti legisladornan republikanonan na Philadelphia, Trump a pidi rèspèt di su bisiña na sùit, despues di a yama nan pa violadó i kriminal. “Si México no trata Merka hustamente, ku rèspèt, e reunion aki lo ta inútil i mi mester buska un otro opshon. Mi no tin otro alternativa”.

Trump a sigurá ku e kanselashon di e enkuentro tabata un akuerdo mutuo i ku su gabinete ta trahando den un proyekto di reforma fiskal ku lo redusí e défisit komersial, oumentá eksportashon merikano i generá entrada desde México “ku mester paga pa e muraya si nos disidí tuma e ruta ei”.