WILLEMSTAD.- Riba 3 mil karchi ta loke ku a keda repartí ayera durante di e evento organisá pa Fundashon Bon Intenshon na Sambil. Públiko ayera ku donashon di 5 florin por a risibí un karchi grátis pa e promé anochi di Curaçao North Sea Jazz Festival 2018. E anochi konosí komo e anochi grátis e aña aki lo tin presentashon di Silvestre Dangond i Farruko. For di 5’or di mardugá ora ku porta a habri na Sambil públiko a drenta na kantidat i bai para bou di tèntnan kaminda nan a para warda trankil pa 10’or di mainta ora ku repartishon di karchi a kuminsá. Tin hende a bin ku djùg, otronan ku tas ku ko’i kome, te hasta un persona a bin ku su spiker i pone muzik zona tanten tabata warda pa repartishon di karchi kuminsá. Riba foto algun imágen durante dje evento. E donashon di 5 florin lo keda destiná pa Fundashon Alzheimer.