MERKA.- Despues di kasi 7 luna ku e kantante di ‘Livin La Vida Loca’ a anunsiá su relashon ku Jwan Yosef, e pareha ya kaba ta preparando pa nan seremonia romántiko.

‘Lo e ta algu grandi, mi ke algu mahestuoso’, asina Ricky a deklará den un entrevista. ‘Lo mi ke kontraé matrimonio na Puerto Rico. Esei ta algu ku mester sosodé. Ta for di unda mi ta bini, di unda mi famia ta.

E ta di Suesia i algun di su famia ta di Siria, pues nos lo tin ku hasi algu internashonal. Nos ta wak kiko tei pasa’, Ricky a sigui splika.

Turesten ku Ricky ta masha entusiasmá pa bisa ‘Si’, e ganadó di Grammy ta atmití ku e planifikashon pa e evento no ta bayendo riba spit. Manera por ser antisipá, organisashon di un seremonia spesial ta mas difísil ku e ta aparesé di ta.

‘Tur hende ta papiando dje matrimonio, pero niun hende no ta papiando riba e planifikashon di e evento, paso esaki ta asina difísil’, Ricky a bisa di un forma chistoso. ‘Mi no tabata sa ku e ta asina kompliká pa hinka un evento manera esun ku nos ke den otro’, Ricky a terminá bisando.

Aktualmente Ricky ta presentando den Park Theater na Monte Carlo Resort and Casino na Las Vegas, kaminda e ta presentá su éksitonan di mas grandi tur anochi.