WILLEMSTAD.- E aña aki ta e di 20 aña ku Rignald Maduro ta maestro di seremonia di Festival di Tumba. For di inisio dje siman aki a bira konosí ku Rignald lo stòp di fungi komo maestro di seremonia.
Ayera nochi ‘DEN E BEMBE’ tabatin e oportunidat di por a kombersá un ratu ku Rignald kende a indiká ku e ta kere ku a yega e momentu pa duna oportunidat na un talento hóben pa hasi e trabou di maestro di seremonia.
‘Mi no tin mesun forsa. E desishon no tabata un fásil, fungi komo maestro di seremonia pa Festival di Tumba a bira komo parti di bo bida. Importante ta pa tuma un desishon, ami no ke keda riba tarima te na momentu ku nan bisa bu ku bo mester bai. Mi ta kere ku ta e momentu ku mester krea e oportunidat pa un talento hóben’, asina Rignald a bisa.
Finalmente Rignald Maduro a indiká ku Tito Doran lo ta su eskoho pa remplas’é komo maestro di seremonia den Festival di Tumba.
‘DEN E BEMBE’ a komprondé ku awe nochi durante dje final di Festival di Tumba e públiko lo tin e oportunidat pa sera konosí ku Tito Doran komo maestro di seremonia.