WILLEMSTAD.- Ayera nochi AMAK a tene su rueda di prensa relashoná ku e di 50 edishon di Festival di Tumba. E aña aki e Festival ta keda dediká na Rignald Silvestre Recordino, konosí komo Doble R.
Doble R a partisipá den Festival di Tumba komo músiko, kompositor i areglista. El a gana Festival di Tumba komo kompositor, areglista i na vários okashon a kompañá ku su banda Doble R Super Special Stars kantantenan ku a resultá Rei di Tumba.
Ayera nochi na momentu ku a dun’é palabra e ilustre músiko a duna e siguiente disertashon:
“Na promé lugá, mi kier a apuntá nunka no mester ta e intenshon pa primordialmente bo haña elogio ora bo ta hasi un kos, bo ta hasié pasó bo ke hasié bon,
Pero si bo haña elogio tambe, si bo trabou keda honra ku satisfakshon ku elogio ku aseptashon. Esei ta un kos ku ta pone bu sinti bu bon
Mi ta sumamente kontentu ku un ‘hit’ impaktante asin’aki ku ta 50 aña Festival di Tumba a toka ami e honor pa keda agasahá, ta un kos hopi spesial pa mi naturalmente.
Mi ta kere ta bon pa bisa ku loke nos a hasi ta un tim e tabata, un grupo, un ekipo di músiko, spesialmente kantantenan ku a dediká nan tempu nan talento i soportá mi sufisientemente tambe pa a trese loke ku mi tabata ke pa nan trese dilanti, kada un músiko, pero no mester lubidá e fanátiko, ku ta apoyá bu ora kosnan no bai bon, ora e no ta muchu kontentu e ta duna bu su apoyo ma tòg, ta kos ku nos no ta lubidá, pero ta kosnan ku ta pone bu krese.
Danki na mi bisiñanan ku a soportá mi tantu aña pe bochincha ei i ku bo por a logra di hasi loke bo tabatin intenshon pa hasi”.