WILLEMSTAD.- Pa motibu di e éksito rotundo di ‘Salsa de los Bravos’ na Brakapoti Mei Mei djasabra último, Randal Corsen & Orkesta lo duna otro show di kita sombré djasabra dia 5 di ougùstùs na e mesun sitio.

Djasabra pasá mes a bende e promé 100 karchinan pa e presentashon nobo entre esnan ku a asistí kaba na e promé show i kaminda a duna oportunidat tambe pa baila riba e músika.

Benta di karchi na rason di 50 florin pa persona pa ripitishon di e show ta kuminsá e fin di siman aki na Mensing’s Caminada i Van den Tweel Zeelandia i Jan Thiel. Klaro ku e orkesta konsistiendo di 16 músiko lo ripití hopi di e piesanan di e promé presentashon, pero e pianista i lider di orkesta Randal Corsen no ta ekskluí ku aki aya nan lo inkluí algun sorpresa.

E programa lo ta basá riba ‘salsa brava’, e forma mas rudimentario di músika salsa manera a apliká i te awor ta apliká na New York. Konkretamente, e anochi ei nan lo interpretá atrobe piesa di grandinan di salsa, manera Ruben Blades, Celia Cruz, Hector Lavoe i Ray Barreto i tambe di nos mes Macario Prudencia.

Randal Corsen na piano lo ta kompañá pa Eric Calmes riba baho, Pernell Saturnino riba perkushon, Marlon Conradus riba drùms, Ernie Gregorius riba timbales, Eric Brigitha riba bongo i kampana, Royston Hato riba perkushon i pa backing vocals, un sekshon ku 6 supladó bou di guia di e trompetista Igort Rivas, miéntras ku Dibo Doran, Yumarya Grijt i Rich Pieter lo ta e kantantenan atrobe.

Si tin un kos ku e promé anochi e demostrá bon kla, anto ta ku salsa ta leu for di ta muri bai. Kontal ku presentá salsa na bon nivel, por haña un bon oudiensia tambe pa esei.  E kantidat di alrededor 700 hende ku tabata presente djasabra por konfirmá esei. Pa e otronan tin un chèns mas dia 5 di ougùstùs awor.