MERKA.- Segun un relato ku ‘Entertainment Weekly’ a publiká, ayera den korte nan a prohibí Rob Kardashian, 30 aña, ku e no mag yega serka di su eks Blac Chyna, 29 aña.
Kardashian siman pasá a publiká riba Twitter i Instagram algun potrèt sunú di Chyna, e potrètnan aki formando parti di un tiramentu di palabra i lodo entre nan dos.
Den e publikashonnan di Kardashian e ta tilda Chyna ku ta un yu so e tabata ke di dje pa dje forma ei e logra di drenta bèk ku su eks ku ta ‘Tyga’. Di su banda Chyna a kulpa Kardashian di maltrato.
Aña pasá den luna di aprel e pareha a hasi nan relashon konosí, pero pa desèmber nan a split for di otro.
Den e dokumentonan ku a keda presentá na korte ta indiká ku Chyna ta ‘morto spantá’ di Kardashian, esaki debí ku e tin un pistol i na vários okashon a menasá di kometé suisidio.
Den su promé reakshon djaluna mainta durante dje programa ‘Good Morning America’, Chyna a indiká ku Kardashian tabata un hende ku e tabata konfia.