MERKA.- Robin Thicke i Pharrell Williams mester paga e famianan ku a keda atras di e kompositor i kantante, Marvin Gaye kasi 5 mion dòler pa motibu di a faya ku derechinan di outor. Esei ta loke un hues na California, Merka a disidí den un kaso relashoná ku e komposishon ‘Blurred Lines’.
E músikonan ta paga huntu kasi 2.8 mion dòler, segun e revista Billboard. Aserka kada un mester duna un parti di nan entradanan personal pa via dje komposishon.
Pa Thicke esaki ta kalkulá na kasi 1.8 mion dòler, miéntras  ku Williams i su kas diskero debe e famia mas o ménos, 358 mil dòler. Debí ku e kaso tin algun aña den korte, e famia di Gaye tin derechi tambe na 10 mil dòler na renta.
Den e desishon di korte tin pone tambe ku e famianan for di awor lo risibí mitar di e entradanan ku e kansion lo risibí na derechi di outor.
E kaso ku a kuminsá na 2015 a keda katalogá den e industria musikal merikano komo un dje kasonan grandi di derechi di outor. E famianan di Gaye a haña ku e komposishon ‘Blurred Lines’ ku na 2013 tabata un hit grandi, tabatin demasiado similaridat na e komposishon ‘Got to Give it Up’ ku na 1984 e fayesido kantante Marvin Gaye a produsí, i korte a duna nan rason.
E dos kompositornan inisialmente lo mester a paga e montante rekòr di 7.4 mion dòler na e famianan di Gaye. Finalmente ta trata di un montante di 5 mion dòler.