WILLEMSTAD.- Festival di Tumba 2019 a keda dediká na Rolando ‘Roy’ Antonio Senchi e ‘Rei sin Korona’.
Nasé na Kòrsou dia 3 di yüni 1947, Roy ta bini for di un ambiente i famia di músika, Roy a konta kon su bida komo tumbero a inisiá i kon esaki a transkurí durante añanan.

Ken ta Roy?
Un pregunta difísil pa kontestá, pero un persona ku un trayektoria di bida largu. Pero tur kos a inisiá for di mucha partisipando den diferente banda. Segun añanan ta bai, Roy a kuminsá forma parti den bandanan manera Perfecta, Eksploshon Latina i serka Doble R tambe kual tabata e último aña ku Roy a partisipá den Festival di Tumba.

Bida komo tumbero
Roy a partisipá den Festival di Tumba promé biaha na aña 1979 i e último biaha na aña 1985. Durante di añanan, Roy a bin haña e nòmber di “Rei sin korona” debí ku semper ku el a partisipá na tumba, su komposishonnan a dal masha duru mes pero nunka e la kai den premio òf bai ku e korona di Rei di Tumba.
Algun komposishon ku mas a dal e tempu ei tabata “Habri kaminda laga pasa” i “Lag’e kos bai hala mara”. Estrellas del Caribe, Doble R, Eksploshon Latina i Perfecta tabata algun di e bandanan ku Roy a yega di partisipá kuné.

Preparashon promé ku subi esenario
Promé ku un presentashon i promé ku  subi esenario semper Roy tabata papia ku su ruman i wak kiko lo ta bon pa hasi i kiko no pa asina pa e presentashon bai mihó posibel, pa despues ensayá di un forma serio. ‘Na momentu ku bo bai Tumba ku un banda ku bo no ta forma parti di dje, semper bo ta haña e chèns di ensayá último. Pues semper tabata mihó pa bo prepará bo mes èkstra bon promé ku ensayo ku banda tuma lugá.
Festival di Tumba di ántes tabata henteramente otro kos. Kada banda tabatin su propio ritmo i estilo masha trankil. Antes lo bo por a rekonosé un banda riba su ritmo sin wak ta ken. Aktualmente Festival di Tumba konosé masha hopi regla, lokual nos no tabata konosé ántes. Algu remarkabel di ántes tabata ku no tabatin asuntu di e 10 òf 12 mihó nan riba un disko kompakto.
Ta e promé tres mihó/Ganadó nan tabatin i nada mas. Pues bo tabata sinti bu obligá pa duna bo presentashon mihó posibel sigur mirando ku tabatin e tendensia di “Rei/Reina saliente no por bai kas sin premio’, asina Roy a splika.

Bida aktual
Aktualmente Roy ta un penshonado pero ta sigui laborá komo dùrwarder sivil na momentu ku mester. Tambe Roy ta dediká su bida na su kasá, yu, nietu i famia den un ambiente masha trankil. “Si bo ta hóben i bo ta sinti bu yamá pa Tumba, bai pe i purba keda ku e mihó rekuerdonan posibel. Pasó ora bo bira grandi, ta memoria so ta keda atras,” Roy Senchi a terminá bisando.