WILLEMSTAD.- Ayera nochi e sala ‘Starlight’ di Freewinds a resultá chikí pa e konsierto di Romeo Heije i Boy Thode. ‘Fundashon Nos Grandinan’ a organisá un konsierto pa rekoudá fondo ku a resultá un éksito kompletu. Tantu pa benta di karchi, pasó e sala tabata yen, komo pa e presentashon dje dos artistanan Romeo i Boy ku a duna un tremendo presentashon. Ekselente, esei ta e promé palabra ku organisadó Geselle Rosaria-Coffi a bisa ‘DEN E BEMBE’. “E hendenan ta pidi ripitishon, esei ta duna mi satisfakshon. Nos ke pone un ripitishon, pero mester tene kuenta ku e kalènder di Freewinds. Romeo i Boy a keda enkantá ku e vibrashon ku nan a sinti di parti dje públiko. Pa nan e tabata algu fasinante. E kompañamentu di Freewinds Band tabata super bon, nan a zona eksepshonal i a brinda un kompañamentu na nivel”. Di Geselle ‘DEN E BEMBE’ a komprondé ku e aporte di ayera nochi ta bai yuda FNG ku e proyekto ‘E relashon entre e mucha ku e grandi’, un proyekto pa rebibá e norma, balor i rèspèt pa nos grandinan. Riba fotonan nos por apresiá algun imágen durante dje konsierto.