PUERTO RICO.- E bachatero di orígen dominikano, Romeo Santos a deklará ku huntu ku e legendario kantante spañó, Julio Iglesias el a graba un kansion titular ‘Mi Amigu’, ku ta inkluí den su último albùm, ‘Golden’.
Romeo a indiká ku Iglesias a tuma kontakto kuné promé pa e partisipá huntu kuné den un produkshon musikal di ‘duo’.
Apesar ku Santos a bisa Iglesias ku pa e lo ta un honor kolaborá ku e produkshon dje kantante spañó, e bachatero a proponé pa mihó graba un tema nobo di Romeo i den e ritmo di bachata, ‘El Amigo’.
‘Ban hasié’, asina el a bisa mi, Santos a sigui splika agregando ku tabata un honor pa konta ku su partisipashon.
Santos a sigui relatá ku el a biaha pa Marbella, Spaña kaminda a graba e bos di Iglesias, i despues el a regresá New York pa kaba ku e grabashon.
Durante dje grabashon na Spaña, Iglesias a yam’e i puntr’e: ‘ E kansion ku bo a skibi aki ta un pa e pénis?... bo ta un genio’.
E ta un tema ku nunka lo bira bulgar, pero tambe mester ta algu ku bo ta di akuerdo kuné’, asina Santos, kende ta eks miembro di Aventura a indiká.
‘E ta mi aliado, e ta kompañá mi. Mi konfidente den mi hazañanan, e ta mi amigu fiel’, ta parti dje letranan dje kansion, kaminda tambe nan ta kanta ku e ta ‘ardiente, imperativo, aventurero, un kompinchi di mi deseonan’ i ta afirmá ku e ta ‘efisiente i parandero’.
E kolaborashon ku Iglesias ta un di vários ku ta inkluí den e albùm ‘Golden’. Otro dje kolaboradornan ta Daddy Yankee, Nicky Jam, Juan Luis Guerra, Ozuna, Swizz Beatz i Jessie Reyez.