MERKA.- Romeo Santos a gana un demanda ku tabatin den su kontra hasi pa Nasim I. Guity, kende a alegá ku e bachatero a violá su derechinan komo kompositor den e kansion ‘Eres Mia’, komponé pa Santos i ku a keda lansa na 2014 komo parti di e album ‘Formula Volumen II’ i ku segun e alegashon lo mester tabata kopia di un komposishon ku e mesun nòmber ku a keda lansa pa e demandante na 2011.
Santos i su kas diskero, Sony Music Entertainment Inc., representá pa e abogado David Aranoff, a demostrá ku no ta eksistí similaridat entre ámbos kansion, motibu pa kua no tin violashon di niun derechi di outor debí ku e título dje kansion no por ser konsiderá un ekspreshon protehé.
Santos mester a entrega tur vershon oudio di e kansion i tambe letranan tradusí di spañó pa ingles, loke despues e korte a determiná ku no tin semehansa entre e kansionnan.
Bou dje leinan di derechi di outor, un título di un kansion no ta un ekspreshon protehá, tampoko e uso di frasenan komun i koriente, a ménos ku ta eksistí un patronchi ku fásilmente ta identifiká e dos obranan.
Apesar ku ela gana e kaso, e reakshon di Romeo tabata un ku smak marga. ‘Ounke ku e hues a determiná na mi fabor, emoshonalmente mi no sa si e kos aki por wòrdu yama un viktoria. Mi mester a defendé un kreashon ku ta berdaderamente di mi. Niun hende no mester hunga ku obranan, trayektoria, ni e tempu di niun hende’, asina e artista a indiká.