Ronaldi Vos, eks-kampion pinpòn na Kòrsou i aktual kampion na Boneiru

Deporte

WILLEMSTAD.- Ronaldi Vos, mihó konosí komo "Nònò" òf "Naldi", a nase dia 12 òktober 1966 na Kòrsou. Nònò ta hopi konosí tantu na Kòrsou, Boneiru i Aruba komo koredó di motersaikel. Pero Nònò tin su deporte preferí ku el a kuminsá praktiká for di diesdos aña di edat, i esei ta tènis di mesa (pinpòn).

Karera komo deportista:
Nònò a kuminsá hunga pinpòn na aña 1978 riba un tabla ku e tabatin na kas, despues ku el a haña 2 racket i nèt serka Sinterklaas. Mesun aña 1978 el a bira miembro di Divi Divi ku tabatin su klup na Wageningenstraat, Steenrijk.
Nònò huntu ku Anibel Lopez ku tabata kampion di Kòrsou 1981 i 1985 tabata sali for di di Ser’i Pietermaai bai train pinpòn na Divi Divi. Su promé entrenadónan tabata André i Hubert Sambo. Anibel Lopez tabata su mihó amigu i mentor na mucha.
Ademas di pinpòn, Nònò tabata praktiká e deportenan di karate, futbòl i beisbòl den Senior League. Den karate e tabatin faha maron. Na skol tambe Nònò tabata hunga pinpòn i el a kompetí den kampionatonan pa St. Paulus College, situá na Saliña, i tambe a partisipá na Weganan Interinsular na Aruba.
Durante di su karera na Kòrsou, el a bira 5 biaha Kampion di Kòrsou komo miembro dje ekipo SHOT. Mas aleu Nònò a sigui kursonan nivel 2 i 3 di entrenadó na Colombia, El Salvador i Uruguay.

...Nònò Vos na Dortmund, Alemania, pa Kampionato Mundial 1989...

Internashonal:
Na 1989 Nònò a hunga ku Kòrsou den Kampionato Internashonal di tènis di mesa kontra di Sürnam, torneo ku Kòrsou a gana 5-0. E mesun aña el a hunga un torneo na Dortmund, Alemania, i entre otro a enfrentá e kampion di mundu di e tempu ei . Tambe Nònò a partisipá na Juegos Deportivos Centro Americano y del Caribe na Maracaibo, Venezuela.
Na 2018 el a bai biba na Boneiru, kaminda aktualmente e ta kampion. Na 2019 e tabata Nr. 1 riba ranking.
Paisnan ku el a bai komo hungadó: Aruba, Boneiru, Sint Maarten, Venezuela 5x, Colombia, Sto. Domingo 3x, Jamaica, Barbados, Trinidad &Tobago, Cuba, Panamá, Alemania, Guyana, Martinique, Puerto Rico 3x i Merka.
Tambe el a biaha diferente biaha komo coach pa kompetensianan na Hulanda, Sto. Domingo, Venezuela, Sürnam i Aruba.

...Nònò na Martinique, Kampionato di Karibe 2015...

Logronan:
- 1981 Sup Kampion di Kòrsou individual junioren.
- 1982 Kampion Pinpòn eskolar kategoria C-maskulino te ku 16 aña.
- 1983 2do lugá den torneo eskolar kategoria D (St. Paulus)
- 1983 Kampion individual hubenil
- 1983 Sup Kampion dòbel maskulino.
- 1984 Kampion Tafeltennis Tienkamp di CTTB (7 ganá i 2 pèrdí).
- 1988 Sup Kampion di Kòrsou ku SHOT.
- 1988 Kampion Torneo Interinsular na Aruba.
- 1989 Kampion individual Tafeltennis Toernooi ATTA na Aruba.
- 1989 Sup Kampion dòbel maskulino Ronaldi Vos/Lualdi Westmaas, na Tafeltennis Toernooi ATTA na Aruba.
- 1994 Kampion di Kòrsou individual.
- 1994 Sup Kampion dòbel miksto ku Maggy Sprock.
- 1997 / 2004 / 2005 / 2009 Kampion di Kòrsou individual.
- 1997 Kampion dòbel di Kòrsou ku Jaysron Mathilda di apénas 11 aña.
- 2015 Kampion di promé Torneo di Veterano.
- 2016 Kampion di Kòrsou dòbel maskulino ku Dimitri Leon.
- 2016 Kampion Master Single.
- 2016 Kampion di CTTF.
- 2017 Sup Kampion di Kòrsou dòbel miksto huntu ku su yu Ronelly Vos.
- 2019 Kampion Improve dòbel kabayeros Toernooi ku Junny Vos na Boneiru.
- 2019 Kampion individual di Boneiru.
- 2019 Nr. 1 Ranking di Boneiru.