WILLEMSTAD.- E kantante ku a gana diferente galardon na Ulanda, a duna show na ‘Pinkpop’ i ku tin abono riba e listanan di hit na Ulanda ta rumbo pa Kòrsou.
Dia 30 di mart próksimo Sterck Events ta presentá Ronnie Flex na Madero Ocean Club. Ronni ta bini ku su banda ‘Deuxperience’. E show lo konta tambe ku presentashon di dj Sento, dj Carlito i komo artista invitá Idaly.
Ta despues di 2 aña ku e públiko di Kòrsou lo keda entretené ku un anochi kargá ku urban vibes di Ronnie Flex.
Su karera musikal durante dje último dos añanan a konosé un kresementu eksepshonal. Ronell Langston Plasschaert, su nòmber original, a krese i bira un artista di e género di hip hop i urban sumamente grandi di e generashon aki, motibu pa kua aña pasa el a risibí e galardon ‘Popprijs’.
E galardon ta keda otorgá na e banda òf artista ku durante dje último aña segun un grupo di hurado a duna aporte di gran balor na e género di músika pop ulandes.
Ronnie Flex ta ser konsiderá e mihó misionero pa e género di hip hop ulandes.
E artista invitá dje anochi ta Idaly. E rapper ulandes tin diferente kolaborashon tras di lomba, manera entre otro Josylvio, Frenna i Jonna Fraser i ta konosí pa entre otro e hitnan ‘Verdient’ i ‘Wine Slow’, pa kua  Ronnie i Idaly a kolaborá huntu. Karchinan ta optenibel via di e puntonan di benta konosí di Tibbaa i riba Tibbaa.com.