WILLEMSTAD.- E tan spera konsierto ‘Tribute 2 Bob Marley’ di Junior Tecla ku Rootsriders a resultá un éksito kompletu.
Mas ku 2 mil hende a yena Madero Ocean Club na Mambo Boulevard pa disfrutá dje presentashon di Junior Tecla, Tamara Nivillac i nan invitadonan.
E formashon musikal ‘Vibenation’ a habri e anochi ku presentashon di Naomi Silvanie i Zoinx. Ambos kantante a duna un bon presentashon. Miéntras Madero tabata yenando ku públiko e espektativa pa presentashon di Junior Tecla a kuminsá krese i bo por a sintié den públiko. Nan no a pèrdè pa gana, pasó fo’i ora Junior a subi tarima e públiko a hala bin dilanti stage i a keda gosa di kada kansion ku a keda presentá. Nan a baila, kanta i respondé koro na momentu ku esaki a keda pidi dor di e kantantenan.
Tamara Nivillac kende tambe ta forma parti dje show huntu ku Junior Tecla tambe tabatin un bon presentashon. E manera fásil ku Tamara ta interpretá su kansionnan i su interakshon ku e públiko sigur a hala atenshon.
Den e parti final dje show nos a tuma nota kon e konosido kantante di Reggae, Rasta Farley, tambe a djòin e show i huntu ku Junior a presentá, meskos tabata e kaso di Naomi Silvanie kende tambe a subi pa interpretá un kansion.
Amantenan di músika di Reggae sigur a haña loke nan tabata spera riba e anochi karga ku músika di Robert Nesta Marley, ke tremendo konsierto di Junior Tecla i ‘Rootsriders’.
Riba fotonan ku ta kompaña e artíkulo nos por apresiá parti di e show. Bishita e wèpsait di EXTRA, www.extra-v2.mystagingwebsite.com pa bo tuma nota di mas potrèt i keda pendiente pa un reportahe visual dje konsierto.