MERKA.- Rosalía, Juan Luis Guerra i Alejandro Sanz ta tres dje artistanan ku lo subi tarima pa rindi homenahe na Juanes kende relashoná ku e edishon dje aña aki di Latin Grammy lo risibí e galardon di ‘Persona di Aña’.
E akademia latino di grabashon ayera a duna detaye den un komunikado kaminda nan a anunsiá e kompañeronan i amigunan dje músiko kolombiano ku lo partisipá den e gala spesial ku lo tuma lugá otro siman, 13 di novèmber den e sala di MGM na Las Vegas kaminda lo rekonosé e trayektoria musikal di Juanes.
Huntu ku Rosalía, Juan Luis Guerra i Alejandro Sanz lo tin presentashon tambe di entre otro Fonseca, Ozuna, Draco Rosa, Cami, Alessia Cara, Paula Fernandes, Mon Laferte, Morat, Sebastian Yatra, Jesse & Joy, Fito Paez, Pablo Lopez i Orianthi.
E seremonia di e galardon ‘Personahe di Aña’ ta tuma lugá un dia promé ku e fecha di premiashon di Latin Grammy ku e aña aki ta selebrá su di 20 edishon.
Juanes ta ganadó di 23 Latin Grammy i 2 Grammy. Juanes lo uni su mes na un lista prestigioso di galardonadonan di e premio ‘Personahe di Aña’ ku ta inkluí Marc Anthony, Miguel Bosé, Roberto Carlos, Vicente Fernández, Juan Gabriel, Gilberto Gil, Julio Iglesias, Maná, Ricky Martin i Carlos Santana.