HULANDA.- Dòkternan a konsehá Rossana Kluivert pa no biaha pa Kòrsou pa hasi grabashon pa su ‘reallifeserie’ riba TLC. Den luna di mei Rossana a biaha pa Barcelona, Spaña kaminda ku ela keda operá despues ku a konstatá ku e tin kanser na pechu.
Su dòkternan ta haña ku no ta responsabel pa e posponé radiashon, asina ela skibi riba Instagram. E grabashonnan ta keda posponé pa e motibu ei.
E kasa di eks futbolista, Patrick Kluivert den e serie di TLC ‘Kluivert Dog Rescue Center’ lo mester a bai skapa kachónan di kaya aki na Kòrsou.
‘Lo mi mester a biaha pa Kòrsou pa mi realisá mi soño huntu ku un grupo di hende fantástiko ku lo a realisá esaki for di Hulanda, Bèlgika i Kòrsou’, asina ela skibi bou dje potrèt di su ‘post’ riba Instagram.
Pa mas ku 10 aña Kluivert ta sali na yudansa di kachónan di kaya. Ku yudansa di famia, amigunan i e abitantenan di Kòrsou e ke lanta un sentro di kuido pa kachó.