WILLEMSTAD.-  Djamars awor lo tin e último show riba Freewinds te ku luna di aprel, ora ku nan ta bèk. Den e show di djamars awor lo tin presentashon di e kantante internashonal yu di Kòrsou, Roxy Rosario.
Músikonan ku lo kompañá Roxy den e show aki lo ta su tata Hershel Rosario riba bass, Stanley Betrian riba guitara, Rònchi Mathew riba piano i Lonte Conradus riba drùms. Tambe lo  presentá komo músiko Patrick Zagury riba guitara i John Politakis riba drùms. E dios últimonan aki ta músikonan di The Freewinds Band. Lo tin dos kantante invitá den persona di Yentje Brazil i tambe Debbie Beaujon.

ROXY ROSARIO
Roxy Rosario a nanse na Kòrsou riba un 13 di febrüari i a kuminsá kanta for di dia ku e tabatin 4 aña i a kompetí den vários festival. El a lanta den músikonan ku tabata su propio famia kual tambe tabata su inspirashon pa e por a drenta e mundu di músika.
Su karera musikal komo korista i solista, el a yega di forma parti di diferente grupo manera Verdecillio, Pumpulunchi i otronan.
Su gran talento musikal a keda rekonosé pa profeshonalnan di e region i di músikonan di nòmber manera Izaline Calister, George Willems, Ced Ride i Maruga Bogaard, kende nan el a yega di kanta na vários okashon komo ‘back up singer’.
Na 2008  el a kuminsá su karera komo kantante profeshonal na e Isla di Rodas ( Gresia) den realisashon di un homenahe na ‘The Supremes’.
Roxy a sigui su karera na Spaña, kaminda el a hasi homenahe na diferente kantante manera Whitney Houston, Diana Ross, Celine Doin, Alicia Keys, Aretha Franklin, Tina Tuner, Chaka Khan, Natalie Cole, Randy Crawford, Anastasia i hopi mas.
Despues di su famoso éksito e ta bira kandidato di e gran evento ku ta tuma lugá na Santa Cruz na Tenerife, Spaña, esta Tenerife Entertainment  Awards 2013 den e kategoria di “Mihó Kantante Femenino”.
Roxy a forma parti tambe komo vokalista di Joe’s Band ( banda ku ta toka soul, funk, disko di Isla Canaria, Spaña) . Tambe el a kolaborá komo vokalista den e músika elektróniko di DJ Ben Simmington, DJ Nate, DJ Jenny i DJ Les Schmitz i tambe vários otro lugá manera TIBU, Papagayo Beach Club, Hard Rock Café i otro lugá mas na Tenerife, Spaña.
Na 2015 Roxy a partisipá den e di tres edishon di ‘E Bos’ di Spaña i el a keda selekshoná pa e kantante konosí Alejandro Sanz pa forma parti di su ekipo.  Roxy a yega di kanta ku artistanan manera Ricky Martin i Malu.

RESERVA BO ENTRADA

Entrada pa e konsierto aki ta kosta 25 florin i por reserva esaki adelantá na number 524-4014 òf por manda WhatsApp na +34609252835. E konsierto aki ta bale la pena pa esun ku ke disfrutá di bon músika. No por pèrdè.