WILLEMSTAD.- Fundashon Desaroyo Marie Pampun i Besindario manera tur aña ta organisá un tremendo siman di kultura pa su abitantenan.
Awe, djárason 26 di sèptèmber, lo tin un tremendo charla riba historia di Batimentu di Huda. Esaki ta ser duna pa e konosedó di e tema aki ‘Djo’ Marchena.
Bin pa bo tende i lo bo keda babuká di ki influensia ‘Bati huda’ tin den nos komunidat. Batimentu di huda ta un manera pa e pueblo saka su rabia i vengansa riba susesonan ku nan ta sinti ku ta afektá e komunidat. Na Kòrsou tin un fundashon ku ta hasiendo hopi esfuerso pa mantené e parti di e kultura aki na bibu.
E charla interesante aki ta tuma lugá den Sentro Desaroyo Sosial Marie Pampun na Balaoestraat 23. E ta di 7 or pa 9 or di anochi. Un boka bisa otro pa bin topa ku batimentu di huda. Pa mas informashon por yama 513-4190 òf 696-6735.