Rudy Plaate, "Groenteboer” kantante i eks-kampion di tènis

Deporte

Strea sobresaliente di nos deporte

WILLEMSTAD.- Kòrsou sa di Rudy Plaate (5 febrüari 1937) komo músiko/kantante. Tambe hopi hende ta kòrda ku e tabata un komersiante, un plantadó i bendedó di berdura. Loke kisas hopi hende a lubidá òf no ta na altura, ta ku Rudy Plaate tabata kampion di tènis di Kòrsou i Antia Hulandes. Por bisa ku Rudy ta un dje leyendanan di historia kultural di Kòrsou.

Karera komo deportista:

Rudy Plaate a kuminsá su karera komo tenista na aña 1953, ku 16 aña di edat. Su tata Hugo Bakhuis kende tambe tabata un tenista konosí i un futbolista internashonal, a siñ’e hunga tènis. Den e mesun aña ku Rudy a siña hunga tènis el a bira kampion Hubenil di Kòrsou. E aña siguiente, 1954, el a bolbe bira kampion Hubenil. Despues di esei el a pasa over pa kategoria senior, di kua el a yega final ku Ramon Pimentel kende a gan’é.

Rudy tabata den e team R.C.C. (Racing Club Curaçao). Na aña 1957 e tenista hubenil Rudy Plaate a bai Mexico, pa bai subi su nivel di tènis serka un entrenadó mehikano.

Dado momento den su karera Rudy a keda 10 aña sin kompetí pa motibu ku nan a deklar’é komo hungadó profeshonal. Despues di un aña di inaktividat i ku e tabata instruktor di tènis, Rudy a wòrdu rehabilitá komo amatùr. Despues el a hasi un tremendo come-back i a konkistá e título individual di Kòrsou, ganando Ruben Flores den final. Den mesun aña el a gana e título antiano, komo tambe titulá kampion di torneo di Asiento i dje torneo “Copa Venezuela”.

...E hóben Rudy Plaate ku racket...

Algun torneo i kampionato den kua Rudy a kompetí:

- 1956 Sup kampion torneo R.C.C..

- 1957 "Leo Plaate Memorial Cup". Den semi final a bandoná wega pa motibu di kramp.

- 1969 kompetensia di aña entre Kòrsou i Sürnam, ku e bishitantenan komo kampion.

- 1972 Titanenstrijd

- 1972 Den delegashon di tènis di Kòrsou pa e kompetensia di aña entre Kòrsou i Sürnam na Sürnam.

- 1975 ku RCC (Racing Club Curaçao) a gana Boneiru 6-5.

No ta e deporte di tènis so Rudy a praktiká. E ta koredó di baiskel di kareda i tabata amante i organisadó di karedanan di ‘drag’.

...Rudy komo instruktor di tènis na Hilton Hotel...

Karera komo dirigente tékniko:

Pa medio di Rudy su tremendo preparashon, e tabata adekuá pa bira instruktor di tènis i komo resultado di esei a keda deklará komo hungadó profeshonal konforme reglanan di tènis. Komo konsekuensia di esei, e no por a kompetí mas na kampionatonan ofisial durante un periodo di 10 aña. Rudy tabata duna lès na Hilton Hotel, Rust & Burg i Asiento. Un di e gran tenistanan ku a haña lès serka Rudy tabata Corva Lourens.

Ademas di tabata gran deportista, Rudy ta kantante tambe. E tabata kanta hopi ku Tipiko Boneriano. Na 1980 el a saka un kantika di kua e letranan ta bisa... "Mi ke sa ta kon Kòrsou lo bira aki 20 aña na aña 2000”. Di e letranan dje kansion aki vários dje ponensianan despues a bira realidat. Tambe el a kanta “Dushi Kòrsou”.