WILLEMSTAD.- Rumba Band den e siman aki a lansa un single nobo riba merkado ku ta hiba di título “TBT Bon Tempu”. Ta un medley di kansion nan lokal di ántes ku a bira hit grandi den nan tempu, i ku aworakí a wòrdu graba bibu den e estilo di Rumba Band.
E single nobo ta kantá pa Henley i Reinier. Ya e piesa aki a wòrdu toká siman pasá i por a mira kon tur hende ta kanta huntu ku Rumba ya ku ta melodia nan konosí ku ta zona dushi den bo orea. Huntu ku e single nobo aki Rumba Band a lansa nan página di Instagram tambe kual ta Rumbaband_Official. Pues awor tur hende por ‘follow’ Rumba Band riba tantu Facebook komo Instagram.
Pa mañan djasabra Rumba Band lo presentá den e tradishon nobo di tur djasabra anochi na Magnate yamá ‘Bottles’. Lo tin special riba tur bòter henter anochi. Naturalmente e piesa nobo lo zona mañan anochi huntu ku tur e otro hit nan. Pues Rumba Band despues di un eksitoso periodo di tumba i karnaval awor a la karga ku su ambientenan kustumbrá.