KRALENDIJK – Tin mas i mas indikashon ku di bèrdat tin hende ta mata buriku pa kome na Boneiru. E rumornan aki tabata koriendo pa algun luna kaba, te ku e defensor di buriku riba e isla aki, Marina Melis, a pone un ‘post’ riba facebook resientemente pa solisitá mas informashon tokante e fenómeno nobo aki. Ta konosí ku por kome karni di buriku. E ta konsiderá asta komo un delikadesa den sierto paisnan.

E burikunan riba e isla aki ta importá pa spañónan masoménos 500 aña pasá. Originalmente e tipo di buriku ku ta move riba e isla aki ta bini for di e region di Eritrea na Afrika. E rasa original ta yamá Nubian ass. Naturalmente despues el a meskla ku otro rasa.

E último lunanan aki, ku mas i mas insistensia, tin informashon ta sirkulá ku den e bario Antriol tin hende ta mata buriku pa kome e karni. Nan ta skohe e burikunan hóben, komo ku lógikamente nan karni ta moli, kompará ku e animalnan bieu.

Reporteronan di BONERIANO a papia ku sigur dos persona ku a sigurá ku nan a kome karni di buriku últimamente i ku esaki ta delisioso i sabroso. E no kier a duna detaye na unda, serka ken, lógikamente. Ta teme ku lo por tuma medida kontra e personanan ku ta mata i kome buriku.

Investigashon ku BONERIANO a hasi sinembargo ta mustra ku bon mirá no tin problema pa mata buriku pa kome e karni. Buriku no ta protehá pa lei, ademas nan ta sòru pa basta problema i molèster den áreanan residensial, entre otro tresiendo tráfiko motorisá na peliger.

Den lei no ta pará tampoko ku buriku ta propiedat di Entidat Públiko Boneiru. Pa e motibu aki tambe gobièrnu no ta asumí responsabilidat pa kubri daño material entre vehíkulo motorisá i buriku. Den e buki ‘Bonaire, Van Indianen tot Toeristen’, ta poné ku masoménos 70 i piku aña pasá a deklará tur buriku den naturalesa komo ‘vogelvrij’, loke ta nifiká ku tur hende por hasi i deshasí di e animalnan aki pa, entre otro, kushiná un bon plato di nan karni.

Den hopi pais por haña karni di buriku riba menú. Na Italia por ehèmpel turista ta bishitá restorantnan ku tin karni di buriku stobá riba nan menú, konosí komo ‘stufato d’asino’ i tapulun. Mester reservá hopi adelantá pa por haña lugá den restorantnan spesialisá den e plato aki, debí na e demanda enorme ku tin.

Na China por kumpra sèntwich ku karni di buriku. Nan ta yam’é ‘lourou huoshao’. Na Italia ademas por haña salami di karni di buriku kumpra. Nan ta yam’é ‘salame di asino’. Na Colombia, pues mas pegá ku kas, por haña platonan prepará ku karni buriku.

Último lunanan aki habitantenan di Rincon ta informá ku e kantidat di buriku ku ta kana rònt a baha.