WILLEMSTAD.- Aña pasá kas di moda na Paris Nina Ricci "L'Air du Temps", a anunsiá ku e talentoso diseñadó yu di Kòrsou Rushemy Botter i su partner Lisi Herrebrugh, konosí pa nan ‘men's wear brand BOTTER’, ganadó di e premio importante di moda internashonal "Première Vision Grand Prize Festival mode d'Hyères" na Fransia, a keda nombrá komo Direktor Kreativo i alabes diseñadó di e prestigioso kas di moda.
Resientemente e talentoso duo aki a hasi nan debut na "Espace Lefebvre Paris 15e arrondissement" na unda nan a presentá nan promé kolekshon nobo di kas di moda eksklusivo Nina Ricci kual a wòrdu risibí ku hopi entusiasmo i aplouso fuerte pa e mundu di moda.
E duo diseñadó, Rushemy Botter i Lisi Herrebrugh a risibí komentario nan masha elokuente di periodistanan internashonal i tambe revistanan di moda manera entre otro Vogue, Elle, Bueau Monde, Allure, New York Times i Volkskrant.
Pronto Rushemy Botter i su partner Lisi Herrebrugh lo ta na Kòrsou pa disfrutá di un vakashon bon meresí. Kòrsou lo risibié ku brasa habrí.