WILLEMSTAD.- Ayera nochi a tuma lugá e estreno dje obra humorístiko ‘Judeska Airlines’ aki na Kòrsou. Despues di dos tour di teatro eksitoso na Hulanda, e último tres presentashonnan ta tuma lugá aki na Kòrsou. Jandino Asporaat den e ròl di Judeska ta kompartí tarima ku 9 aktor ku a bin spesialmente for di Hulanda.

Despues ku el a keda retirá na vários okashon, porfin e ta haña un chèns serka un uitzendbureau pa traha komo stewardess. Ora ku el a pensa ku lo e bai eksperensiá biahenan largu, hotèlnan karu i bebementu di kòktel den zwembad. Pero esaki lo no ta posibel debí ku lo e tin ku bai traha komo ‘ground stewardess’. Su realidat lo bira ku e mester atendé ku maleta pèrdí, pasaheronan sin pasenshi i muchanan ku ta grita.

Ayera nochi e sala di WTC tabata yen yen i ounke tabatin reklamo pa e manera kon a atendé entrada, mester bisa ku e públiko sigur a disfrutá i hari bai plat. Awe i mañan tin e último dos presentashonnan.