WILLEMSTAD.- Luna pasá e promé edishon di ‘Salsa de los Bravos’ na Brakapoti Mei Mei tabata un éksito rotundo. Riba Facebook e komentarionan positivo ta sigui sin fin. Djasabra awor (5 di ougùstùs) Randal Corsen & Orkesta lo ripití esaki kaminda e talentoso guitarista di Aruba Chris Kross lo reforsá e orkesta pa e okashon aki. E no ta kompletamente deskonosí na Kòrsou pasobra resientemente Chris Kross a presentá aki tambe ku e banda Buleria.

E programa ta fiha riba ‘Salsa Brava’, e forma mas rudimentario di músika salsa manera ta tok’é te awe na New York. Pues, e anochi ei lo interpretá piesa di grandinan di salsa, manera Ruben Blades, Celia Cruz, Hector Lavoe i Ray Barreto i tambe di nos mes Macario Prudencia.

Meskos ku luna pasá, esnan ku lo interpretá e piesanan aki ta e kantantenan Dibo Doran, Yumarya Grijt i Rich Pieter. Dibo Doran i Yumarya Grijt a kaba di hasi furor na Ulanda durante vários presentashon, pero nan lo ta bèk na ora pa Salsa de los Bravos di djasabra awor. Su siguiente dia Randal Corsen ya ta rumbo pa Ulanda pa prepará pa e konsierto di ‘Tula – Konmemorá, Reflektá i Selebrá’ di djadumingu dia 13 awor den Stadsschouwburg na Amsterdam kaminda e kantantenan lokal Dibo Doran i Kriss Berry tambe lo presentá.

Orkesta

Pa Salsa de los Bravos karchi ta optenibel na Mensing’s Caminada i Van den Tweel Zeelandia i Jan Thiel.

Lider di orkesta Randal Corsen mes ta na piano, sostené pa Eric Calmes na baho, Pernell Saturnino na perkushon, Marlon Conradus na drùms, Ernie Gregorius na timbales, Eric Brigitha na bongo i kampana, Royston Hato na perkushon i pa backing vocals, e guitarista Chris Kross, e lider di tròmpèt Igort Rivas, e trompetistanan Fefelo Martinez i Ismael Gonzalez Lopez, i e trombonistanan Hector Sampson, El Kiri i Kinito. Esun ku ta pèrkurá pa tur esaki zona A-1 ta e tékniko di zonidu Oscar Bor.