WILLEMSTAD.- Den e mundu di salsa na Ulanda tur esnan riba 50 aña sigur sigur ta kòrda e ‘Salsa jam sessions’ den Café De Kroeg na Amsterdam.
Café De Kroeg tabata den añanan ‘80 i ‘90 é sitio pa amantenan di bon salsa. Den Cafe De Kroeg músikonan salsero i baliadónan tabata bin huntu pa gosa. Diferente músiko ku raisnan di Karibe i di Sur Amérika tabata bin tur djárason huntu pa e seshonnan di toka i djèm salsa huntu.

E músiko i kompositor Edsel ‘Payo Juliet tabata un di e organisadónan i dirigente di e tempu ei. Na aña 1983 Edsel a duna su djèm seshon e nòmber “Salsa Session” p’asina tur hende komprondé ku no ta bin toka otro kos ku no ta Guaracha, Son, Son Montuno, Bomba, Mambo, etcetera!

“Mi ta kòrda ku músikonan manera Nicky Marrero, Arturo Sandoval, Chet Baker, Tito Puente, Candy Dulfer huntu ku su tata Hans, Rosa King, Herman Brood tabata pasa dal un solo i sigui djèm henter anochi. Payo Juliet su “Salsa Session” mester tin sabor pa bailadores balia i gosa. I di bes enkuando bo ta haña bo ku un “Deskarga Musikal” ku ta pone e café ariba bou! Tabata un dushi tempu i hopi músiko tin bunita rekuerdo”.

Durante “Salsa Sessions” hopi ritmo ta nase espontániamente i tambe ta krea estilo nobo di salsa. Edsel ‘Payo’ Juliet: “Algun di mi piesa tambe tin nan orígen den mi Salsa Sessions. Katalina, Descarga, Mi Tumbaito, Te Quiero Maria.  Tur ta piesa ku despues mi a graba riba mi CD ‘Salsa Coriënte’. Pa basta tempu mi ta kana ku e idea pa kuminsá un plataforma na Kòrsou kaminda músiko den nan tempu liber i den un ambiente dushi por toka huntu. Hóbennan Salsero talentoso tambe tin e chèns pa toka i djèm huntu ku músikonan renombrá.

Ku Wim Boereveen di Mundo Bizarro, Payo Juliet a topa su partner kreativo. Kuminsando mañan, 3 di Ougùstùs ta rebibá Salsa Sessions aki na Kòrsou. Segun Edsel e kantidat di músiko i tur e influensianan musikal ta bon representá riba nos isla. "Kòrsou ta konsistí di diferente nashonalidat i kada un tin su propio historia musikal.

Un meskla musikal tremendo e kos aki ta bai bira. Mi ta mashá ansioso pa wak kiko ta bai krese den e Seshonnan di Salsa aki. Mi fórmula ta tumbao di piano, koro, pregon i mambo! I puru improvisashon. No ta bai toka areglo di piesa konosí den nan forma original. I pa e biaha aki despues di basta aña, mi ta bai para tras di mi timbal. Mi no por warda pa ranka sali."

Wim ta agregá: "Mi no konosé De Kroeg su jam sessions. Pero Mundo Bizarro ta un bon lugá pa esei. Den nos programashon nos tin hopi Salsa, p’esei e Salsa Sessions aki ta bai kuadra hopi bon. Ora Edsel a papia ku mi, mi a mira mi dilanti kon músikonan i baliadó di salsa ta bin huntu pa disfrutá di bon muzik di salsa.”

E formashon básiko ta konsistí di Eric Calmes (bass), Magu Reymound (conga), Arnell Salsbach (piano), Ismael Gonzales Lopez (tròmpèt) i Edsel ‘Payo’ Juliet (timbal). Edsel ta invitá tur músiko i tur amante di bon ambiente di salsa pa  bin pasa un ratu Salsiando den Pietermaai.

Mundo Bizarro: for di 3 ougùstùs, tur djaweps di 7’or pm pa 10’or pm
Adrès ta: Nieuwestraat 2 - Pietermaai, Willemstad, Kòrsou. Pa mas informashon yama 514-7257.