WILLEMSTAD.- Ayera tardi Grupo di Karnaval ‘Sambodromo Curaçao’ a presentá su mes i na mes momentu a firma kontrakt ku agrupashon musikal ERA pa nan animashon musikal durante di marchanan di Karnaval.
Grupo di karnaval ‘Sambodromo Curaçao’ ta un grupo nobo ku e vishon pa engrandesé futuro di Karnaval di Kòrsou.
Nòmber di grupo ku ta un nòmber konosí rònt mundu. Sambodromo ta e stadion na Brazil kaminda e gruponan di Samba brasilero ta tene nan desfile. Brazil su karnaval ta konosí rònt mundu i e nòmber ‘Sambodromo tambe.
Pa aña 2018 ‘Sambodromo Curaçao’ a skohe komo tema ‘Amazon Rainforest’ su flora i founa di Brazil.
E trahe ‘Shabono’ ta representá e aldea ku e indigenanan ta biba aden. E ‘Macaw’ ta e para mas konosí den Amazon.
Pa motivá i engrandesé e futuro di partisipantenan den nos karnaval,  ‘Sambodromo Curaçao’ a opta pa duna kolaborashon na un skol i den e kaso aki ta na fabor di Nilda Pinto SBO. Nan trahe ta representá e tribu di ‘Kayapo’.
‘Kayapo’ ta e tribu ku semper a lucha pa mantené nan nan área protehá dor di intrusonan ku kier distruí nan frontera i nan rikesa den nan teritorio.