Playoff final beisbòl Dòbel A

WILLEMSTAD.- Santa Rosa ku bon picheo kombiná di Siamani Boekhoudt i Marvin Ludowika, ta dal Wild Cats ku skor di 4-1 den e promé wega di play-off final di Beisbòl Dòbel A. Riordan Windster tabata bon na bate bayendo di 4-2 i 2 RBI. E dos karedanan empuhá tabata den kabes dje di 9 inning ku a pone e wega 4-1 i hasi e trabou mas fásil pa e relevista Marvin Ludowika den bòm di e di 9 inning.

Santa Rosa a nota 1 kareda den promé inning, 1 den di 8 i 2 kareda den di 9 inning.  Wild Cats a empatá e wega den di 4 inning riba hit di Randy Kirindongo.  Siamani Boekhoudt ku tabata tremendo riba montíkulo pa Santa Rosa a tira 7 inning (101 lansamentu) permití 5 hit, 1 kareda, ku 4 ponche i 3 base por bola. Marvin Ludowika a tira 2 inning tuma 1 hit i poncha dos bateadó.

Jair Jurrjens ku a habri pa Wild Cats a tira 8 inning, (111 lansamentu) tuma 3 hit i 2 kareda limpi, tira 6 ponche i 3 base por bola. Ruwensly Bonifacia a tira 1 tèrsio di inning i Klevert Martina a lansa  e último 2 tèrsio pa Wild Cats. E final ta sigui djasabra 6 or na Stadion Johnny Vrutaal ku wega number 2 di e seri mihó di 7.

NUMERITONAN

Santa Rosa a skor na 4 okashon, dal 5 hit i hunga sin eror. Siamani Boekhoudt a gana. Ildion Martina i Riordan Windster a bati di 4-2.

Wild Cats anotá un kareda, bati 6 hit i hunga sin eror. Jair Jurrjens  a resultá e picher pèrdèdó. Rojean Cleofa a bati di 2-2.