Nan último título máksimo ta data di 1968

WILLEMSTAD.- Ku gol dje argentino Maxi Ciarniello ma di 93 minüt di wega, Scherpenheuvel finalmente ta logra su promé título komo kampion di Kòrsou despues di nan ultimo koronashon ku ta data di 1968. E ekipo lantá un tempu pa fraternan di Skèrpènè, riba djasabra 7 di novèmber a logra viktoria ku skor mínimo di 1-0 riba Vesta di Sta. Maria, pa finalmente kita e korona di kampion for di riba kabes di Vesta.
E partido a tuma lugá dilanti di masha poko hende den Stadion Ergilio Hato, ku pa motibu di e pandemia di Coronavirus no tabata aksesibel pa públiko en general. E dos ekiponan sigur durante dje promé tempu a hunga un wega hopi kuidadoso, ku masha poko riesgo i ku e balansa levemente na fabor di Vesta.

...E ekipo lanta pa fraternan di Scherpenheuvel (Skèrpènè) mas ku shete dékada pasá. Djasabra último nan a titulá kampion di Kòrsou despues di 52 aña...

Den di dos tempu e partido no a konosé masha kambio i despues dje nobenta minitnan reglamentario mester a bai pa hunga 2x15 minüt. Hopi trempan den e tempu èkstra Ciarniello ta bin skor e gol di viktoria, ku hugada ku a kuminsá for di medio kampo kaminda Vesta ta pèrdè e bala. E bala ta bai dilanti i e pase ta bai direkshon di Ciarniello, kende di forma hábil ta pone e kueru leu for di alkanse di kiper David Gaviria.
Pa Maxi Ciarniello ta su di ocho gol di kampionato, pero sin duda e gol di mas importante una bes ku esaki a resultá e gol di viktoria ku kua e argentino ta yuda pa Scherpenheuvel kue su promé título den kategoria máksimo di nos futbòl despues di sinkuentidos aña.

...E gol di viktoria ta keda anotá leu for di alkanse di kiper Gaviria..

Lógikamente ku e selebrashon riba tereno tabata inmenso, sigur pa un ekipo ku despues di su regreso den promé divishon di FFK seis aña pasá a hunga tres final promé ku esun dje aña’ki, pero a kai vensí tur tres biaha (2016, 2017, 2019). Pero e di kuater biaha si nan ta konkistá e máksimo honor bou direkshon di Bob Bernabela kende na su manera agresivo di dirigí a pone e ekipo aki na tòp di futbòl nashonal.
Pabien na Scherpenheuvel i fanátikonan.

...Kapitan Godfried Penny huntu ku dirigente sra. Corrine Djaoen ta risibí kopa di kampion for di man di presidente di FFK, Shaheen Elhage...

...Despues di nan título di kampion dje kampionato anterior, e biaha’ki Vesta mester a baha kabes pa Skèrpènè. Ethelbert Daal a risibí e kopa komo sup kampion for di man di sra. Constancia...

...Anotadó dje gol di viktoria Maxi Ciarniello, ta risibí su medaya komo kampion...

...Preokupashon na banki di Vesta den e minütnan final...

...Kuerpo di arbitrahe huntu ku Reina I 1st runner-up di sertámen Reina di Futbòl...

...Entrenadó Bob Bernabela ta keda hisá na laria pa su hungadónan...

...Selebrashon di título serka esnan di Scherpenheuvel, miéntras ku un hungadó di Vesta ta drumi batí riba tereno...