Awe ta final 3er divishon: Buena Vista v/s Atletiko Salinja

WILLEMSTAD.- FFK a drenta e fin di siman di weganan final den tantu Liga MCB Promé Divishon komo tambe Terser Divishon. Mañan, djasabra 6 di novèmber, e ekiponan Scherpenheuvel i Vesta ta topa otro anochi pa 19:30 den Stadion Ergilio Hato den disputa dje título di Promé Divishon. Ta trata di dos ekipo ku a krese segun temporada tabata avansá, te ku nan a bin resultá den e wega final.
Scherpenheuvel ta konta ku vários hòmber gol, manera t’e kaso ku Jonathan Font (13), Papa Isenia (11) I Benjamin Guedez (10), miéntras ku Vesta tin Mirco Colina (10) komo su máksimo anotadó.
E final ta ripitishon dje final di kampionato anterior, ku a konosé Vesta komo kampion riba Scherpenheuvel. E pregunta ta si Vesta lo ripití òf si e team di Pariba lo tuma revancha pa e derota sufrí den e final di 2019.
E aña aki Liga MCB a keda dediká na e baluartenan Angel Ramirez (èks dirigente), Eric ‘Papa’ Girigoria (èks rèfri), Ramon Stomp (èks hungadó), Virgilio Silië (eks hungadó), i Arto Leito (èks hungadó). E personanan aki a duna un hopi bon kontribushon na e desaroyo di e deporte rei, futbòl.

...Scherpenheuvel sigur ke e título bèk i komo tal ta bai buska esei mañan anochi...

Terser Divishon
E final di Terser Divishon ta awe nochi den Stadion Antoine Maduro, Atletiko Salinja i Buena Vista den e gran final ku ademas di duna e título di kampion, ala bes lo nifiká promoshon dje ekipo ganadó pa 2da divishon.
Atletiko Salinja ta konta ku e goliadonan Jared Hook (10 gol) I Odair Mook (6), miéntras ku Buena Vista tin Eldridson St. Jago (10) komo su hòmber gol.
Pa motibu di Coronavirus, tur e dos partidonan lo tuma lugá sin públiko.
Por sigui e partidonan via transmishon di Z-86 komo tambe riba Sport.cw riba Facebook.