WILLEMSTAD.- Un rally di tres kareda den oktavo inning no solamente a duna Royal Scorpions e viktoria, pero tambe a bòltu e seri semi final kontra dje kampionnan di Sta. Rosa Indians i a pone e ekipo na un viktoria for di klasifikashon pa final. E skòrpionnan djasabra anochi a gana 5-4 danki na kombinashon di bon picheo i bon fildeo.

Royal Scorpions ta habri e skor den promé entrada ku un kareda, pa despues Sta. Rosa reakshoná ku kareda di empate den mesun inning i sigui ku 2 mas den di tres i 1 den di kuater. A dura un poko pa Scorpions bini bèk ya ku Jordan Lucas tabata pinta nan blanku inning tras i inning. Pero den di shete Scorpions ta skor un kareda mas pa despues bin ku rally di tres den di ocho, loke a resultá di ta sufisiente pa a gana e partido.

Pa Royal Scorpions 5 kareda riba 9 hit i 0 eror. Kevin Moesquit, Stephan Vidal i Jadon Gosepa a liga di 4-2 kada un. Ruderly Manuel a drenta den di tres i a lansa 6 inning di 3H, 2BB, 3SO i a tuma 1 kareda pa finalmente gana e partido.

Sta. Rosa Indians 4-7-3.  Aldair Daal a bati 2 hit den tres turno, inkluyendo homerun. Jordan Lucas a tira 6 inning di 1 kareda, Siamani Boekhoudt 1 inning i tambe a tuma un kareda. Sindley Lint a subi den di shete i no a logra saka out, a tuma un hit, duna un base por bola pero a tuma 3 kareda pa karga ku e derota.

Djamars anochi e ekiponan ta tuma den wega number kuater.