WILLEMSTAD.- Djadumingu último a tuma lugá e apertura di siman di Kai Orgel aya na Museo di Kai Orgel.

E aña aki Sentro di detenshon i korekshon Kòrsou tambe a forma parti di e programa ku Ministerio di OWCS a organisá. Klientenan di prizòn a traha diferente  Kai Orgel di Palu na miniatura pa entregá na Minister di enseñansa señor Sithree van Heydoorn i tambe na representantenan di Museo di Kai Orgel.

Durante di e apertura tabatin un eksposishon kaminda tur presente por a atmirá e bunita kreashon di Kai Orgel  na miniatura ku a keda trahá pa klientenan di SDKK .

Den e siman binidero lo bai bishitá skolnan pa asina duna informashon di Kai Orgel i tambe motivá nos hóbennan pa no kai den kriminalidat i pa nan balorá nan bida. Gerensia di prizòn sigur lo sigui kontribuí ku e proyektonan asina aki, ku ta halsa nos historia i Kultura.